京劇大師梅蘭芳相信大家都聽過佢嘅名，尤其係導演陳凱歌早年拍咗套梅蘭芳同名電影，由黎明擔正做男主角，令梅蘭芳嘅事跡廣為人知。而歷史上嘅梅蘭芳相當犀利，佢响1894年出生，生於一個旦角世家，爺爺梅巧玲係一位「扮相雍容端麗，表演細膩逼真」嘅男旦，被稱為「同光十三絕」之一，去到梅蘭芳呢一代更將京劇提升到另一個層次。蜚聲中外嘅梅蘭芳，原來曾經去過美國等唔同地方表演？

喺1930年，梅蘭芳應邀去美國表演，廣受美國觀眾好評，當時正值美國經濟大蕭條，原本諗住三場演出賣到一半嘅飛算唔錯，估唔到兩個禮拜啲飛就賣晒。當時嘅美國總統胡佛仲寫信俾梅蘭芳，祝佢演出成功，而著名喜劇演員差利卓別靈仲專登由片場趕嚟同梅蘭芳影相添。美國嘅波莫納學院同南加州大學更向梅蘭芳頒授文學博士榮譽學位，感謝佢將中國古典藝術帶到美國。

除咗美國，梅蘭芳仲喺1919年、1924年同1956年三次到訪日本，喺當地掀起「梅熱潮」，國會議員仲破例喺中日未建立邦交嘅情況下，喺議會大廈宴請京劇代表團。

圖片為梅蘭芳同差利卓別靈合照、表演照，取自網絡。